¿Cuentos, novela fragmentaria, llibru d’historia? Memoria de Tuña ye, enantes qu’otra cosa, un diálogu narrativu que l’autor establez ente’l pasáu y el presente, ente la realidá y la lleenda. El puntu de xuntura ye’l llugar de Tuña, el pueblu del conceyu Tinéu que figura en nota al pie nel llibru grande de la historia desque naz nél el Xeneral Riego. Pero per estes páxines caminen xuntos personaxes históricos de relevancia (dalgún romanu, otros Riego, Pelayo, Catalina Suari, Ernest Hemingway, Ugo Foscolo, Elizabett Barrett Browning, Cela, Machado, Onassis, José Maldonado...) y los homes y muyeres que construyen la vida cotidiana dende l’anonimatu. El resultáu ye una obra coral, brillante, sorprendente, que se mueve con llibertá nun arcu temporal de más de dos milenios per esi cruce de caminos que siempre foi el valle abiertu de Tuña y que lleva a cualquier parte del mundu.